संक्षिप्त इतिहास र गतिविधि

प्राकृतिक सौन्दर्यताले भरिपूर्ण भौगोलिक विविधताको अनुपम तपोभुमी नेपाल र बिश्वका विभिन्न भूभागहरुमा छरिएका रहेका सम्पूर्ण कौशिक (कौशिला, कौशल्या) गोत्रका बुढाथोकी, बुढा क्षेत्री, बुढा र वि.सी. कुलवंश परिवारका बन्धुहरू बिचमा अझ बढी एकता र समानताको भावना कायम गर्दै पुर्खाले आर्जेको ऐतिहासिक पृष्ठभूमीको खोजी तथा अनुसन्धान गर्दै कौशिक गोत्रका बुढाथोकी क्षेत्री बन्धुहरूको उत्पति, बंशावली समेत तयार पार्दै वर्तमान अवस्थामा देखिएका सामाजिक, आर्थिक, शैक्षिक तथा अन्य विविध समस्याहरूका समाधानका मार्गहरू पत्ता लगाउन एक आपसमा छलफल गर्दै परम्परागत ऐतिहासिक, धार्मिक र सांस्कृतिक संरचनाहरूलाई खोजी सो को संरक्षण गरी समग्र नेपाल र नेपालीको उन्नतीको मार्गमा टेवा पुर्याउनु साझा चौतारीको विकास गर्ने उद्देश्यले २०५६ सालको कार्तिक १७ गते विधिवत रुपमा “खप्तडी बुढाथोकी क्षेत्री सेवा समाज” ९प्द्यक्० को स्थापना गरिएको हो ।
संस्थाको बिधान मार्फत कौशिक गोत्रका बुढाथोकी, खप्तडी बुढाथोकी, बुढाक्षेत्री, बि.सी., बर्मा बुढाथोकी, कर्मने बुढाथोकी, दधेल बुढाथोकी, खोरले बुढाथोकी, देउवा बुढाथोकी र शौका बुढाथोकीहरु समेतलाई समेटेको यस संस्थाको रजिष्टर्ड केन्द्रीय कार्यालय बाग्मती प्रदेश, काठमाडौं जिल्ला, तारकेश्वर नगरपालिका, वडा न. २०, मनकामना टोलमा रहेकोछ ।
नेपालको पूर्व मेची देखि पश्चिम महाकालीसम्म विभिन्न स्थानहरुमा बसोबास गर्दै आउनु भएका सम्पूर्ण कौशीक गोत्रका बुढाथोकी क्षेत्री बन्धुहरूको बंशावली प्रकाशन गर्ने, कौशीक गोत्रका बुढाथोकी क्षेत्री बन्धुहरू बिच एकआपसमा सहयोगको भावना बढाई बन्धु बन्धुबीचमा पर्ने समस्या समाधान गर्न, नेपाल तथा विदेशमा विभिन्न देशमा बसोबास गर्नुहुने कौशीक गोत्रका बन्धुहरूको नामावली अध्यावधिक गर्ने, आफ्नो कुल धर्म, संस्कृति, रीतिरिवाज कायम राख्दै सामाजिक, आर्थिक, शैक्षिक तथा अन्य विविध समस्याको समाधान गर्ने, विविध कार्यक्रमहरू मार्फत समाजलाई अनुशासित र सभ्य बनाउने, कौशीक गोत्रका बुढाथोकी बंश अन्तर्गतका उच्च तहमा अध्ययन गरी सर्वोत्कृष्ट अङ्क प्राप्त गर्ने विद्यार्थीहरूलाई पुरस्कार तथा छात्रबृत्ती प्रदान गर्ने, आर्थिक रुपले अत्यन्त पछि परेका मेहनती तथा भविष्यमा देशको लागि केही गर्न सक्ने क्षमता भएका कौशीक गोत्रका बुढाथोकी विद्यार्थीहरूलाई आर्थिक सहयोग प्रदान गरी उनीहरूको व्यक्तित्वको विकास गर्न सहयोग गर्ने, गरिव असहाय बन्धुहरूको शैक्षिक, आर्थिक, सामाजिक र धार्मिक उन्नतिको लागि कार्यहरू गर्ने साथै अक्षयकोषको स्थापना गरी सोको आयबाट उल्लेखित कार्यहरू पूरा गर्ने यस संस्थाका प्रमुख उद्देश्यहरू रहेका छन् ।
यस संस्था स्थापनाको सिलसिलामा धेरै महानुभावहरुले प्रत्यक्ष र परोक्ष रुपमा योगदान गर्नु भएकोमा संगठन दर्ता गर्दाको समयमा यासोक १, पाँचथरका श्री विकेन्द्रदीप बुढाथोकी (अध्यक्ष), स्यूचाटार ३, काठमाडौंका श्री श्रीकृष्ण बुढाथोकी (उपाध्यक्ष) , नर्मदेश्वर २, ओखलढुङ्गाका श्री नानीबाबु बुढाथोकी (महासचिव), माझठाना ९, कास्कीका श्री बिष्णु ब. बुढाथोकी (सचिव), बयरवन ७, मोरङका श्री केदार बुढाथोकी (कोषाध्यक्ष) खोपाचाङ्गु ४, दोलखाका श्री खड्ग ब. बुढाथोकी (सदस्य) चित्तपोल ३, भक्तपुरका श्री ऋषीराम बुढाथोकी (सदस्य) महानुभावहरुले संस्थापकको रुपमा रहेर विधिवत रुपमा संस्था दर्ता गराउनु भएको थियो ।
यस संस्थाले संगठन बिस्तार गर्ने उद्देश्य अनुरुप संस्थाको समग्र बिकासको लागि सदस्यता बिस्तारलाई प्रमुख आधार स्तम्भको रुपमा लिई साधारण, आजीवन, मानार्थ र सम्मानार्थ सदस्यहरु थप गर्दै लैजाने कुरालाई सम्प्र्ण जिल्ला कार्य समितिहरुका अतिरिक्त संस्थाको बंशावली एप्लिकेशन र वेभसाइट मार्फत थप प्रभावकारी बनाउदै लैजाने छ । त्यसैगरी संस्थाको बिधान वमोजिम गठन गर्नु पर्ने निर्वाचन क्षेत्रीय कार्य समिति, जिल्ला कार्य समिति र प्रदेश कार्य समिति तथा लेखा समिति गठन गर्दै जाने कार्यलाई निरन्तरता प्रदान गर्दै सातवटै प्रदेश कार्य समिति, बन्धुहरुको उपस्थिति रहेका विभिन्न जिल्लाहरु र बिदेशमा समेत संगठन बिस्तार गर्ने लक्ष्य लिएको छ । कार्य समिति गठन भइसकेका प्रदेश, जिल्ला तथा निर्वाचन क्षेत्रहरुमा नियमित रुपमा साधारण सभा सम्पन्न गर्ने, नियमित रुपमा बैठक गर्ने, कौशिक गोत्रीय बुढाथोकी बन्धुहरुको हकहित र उन्नतीको लागि सदैव कार्य गर्न, कौशिक गोत्रीय बुढाथोकी बन्धुहरुले परम्परा देखी गर्दै आउनु भएका बिभिन्न संस्कारहरुमा छलफल र सहमती गरी एक रुपता ल्याउन प्रयासरत रहने, कूलपुजा, देवाली जस्ता संस्कारजन्य बिषयहरुलाई भावी पिडीहरुले समेत निरन्तरता प्रदान गर्दै लैजाने गरी समयानुकुल परिमार्जित गर्दै लैजान, गोत्र, थर, बंश आदिका सम्वन्धमा बिभिन्न स्थानका बन्धुहरुमा रहेको अज्ञानता र भ्रमलाई हटाउदै सम्पुर्ण कौशिक गोत्रिय बुढाथोकी बन्धुहरुलाई संस्थामा आवद्ध गराउनको लागि कार्य गदै आएको छ ।
यस संस्थाको कारोवारलाई व्यवस्थित र पारदर्शी वनाउन व्यवस्थित रुपमा लेखा राख्ने, बैकिङ प्रणालीबाट मात्र आर्थिक गतिविधिहरु गर्ने, नियमित लेखापरीक्षण गराउने, नियमित साधारण सभा गर्ने, संस्थाको लागि आर्थिक स्रोत जुटाउने, अक्षय कोषहरुको स्थापना गरी विभिन्न सामाजिक गतिविधिहरु संचालन गर्न र व्यवस्थित रुपमा कोषको परिचालन गर्न तथा चल अचल सम्पत्तीको व्यवस्थित अभिलेख राख्ने कार्य गरिरहेको छ ।

त्यसैगरी नेपालको पूर्व मेची देखि पश्चिम महाकालीसम्म र बिदेशका विभिन्न स्थानहरुमा बसोबास गर्दै आउनु भएका सम्पूर्ण कौशिक गोत्रका बुढाथोकी क्षेत्री बन्धुहरूको बंशावली तयार गर्ने गरी कार्य गरिरहेको छ । संस्थाका बिभिन्न विनियमावली, कार्यविधि, आर्थिक, सामाजिक, शैक्षिक लगायतका बिषयहरु, संस्थाको योजना गतिविधि लगायतका बिषयहरुमा समय समयमा सूचना तथा जानकारी आदानप्रदान गर्ने उद्देश्यले तालिमको आयोजना गर्दै युवा तथा महिलाहरुको सहभागीतालाई संस्थाको नेतृत्व तह र सामाजिक परिवेशमा समेत बढाउदै लैजाने गरी कार्य गरिरहेको छ ।
यस संस्थाका झापा जिल्लाका बन्धुहरुको बिशेष पहलमा झापा जिल्लाको बिर्तामोड स्थित नडियावारीमा संस्थाको भवन निर्माण भई बिभिन्न सामाजिक गतिविधिहरु संचालन भइरहेको छ । त्यसैगरी झापा जिल्लाको दमकमा बन्धु भवन निर्माणको लागि जग्गा प्राप्ती भइसकेको र भवन निर्माणको क्रममा रहेको समेत यँहाहरुलाई जानकारी गराउन चाहन्छु । अन्य जिल्लामा समेत क्रमशः बन्धु हित र कल्याणका लागि बिभिन्न कार्यहरु सम्पन्न भइरहेका छन ।
यस संस्थाको आफ्नै केन्द्रिय कार्यालय भवन निर्माण गर्न जग्गा प्राप्ती गर्ने तथा भवन निर्माणको लागि आर्थिक स्रोत जुटाउने सम्वन्धमा पहल भइरहेको छ ।
यस संस्थाको केन्द्रिय अक्षयकोषमा रकम बढाउदै लैजाने र उक्त कोषको लगानीबाट आर्जित रकमबाट यस संस्थाको उद्देश्य वमोजिमका कार्यहरु गर्दै लगिने छन । हरिभक्त बुढाथोकीको आत्मकथा “पसिनाले भिजेको जिन्दगी” पुस्तकको बिक्रीबाट प्राप्तहुने रकमबाट हरि भक्त बुढाथोकी बन्धु कल्याणकारी कोष स्थापना गरिएको छ । उक्त कोषको लगानीबाट प्राप्त हुने रकमको लगानीबाट आर्जन हुने रकम बन्धुहितको कार्यमा खर्च गरिने छ ।
यस संस्थाले गरेका विभिन्न गतिविधिहरुका कारण बुढाथोकी बन्धुहरुमा संस्था प्रति आशा, भरोसा र बिश्वास जगाएको छ । संस्था बिकासको प्रारम्भमा नै रहेको हुनाले अवसर पाएका मनकारी बन्धुहरुले यस संस्थाको केन्द्रिय अक्षय कोषलाई मजवुत बनाउदै लैजान, आफ्नो वा परिवारका सदस्यको नाममा अलग्गै अक्षय कोष स्थापना मार्फत आवश्यक सहयोग गरी अवसरबाट बन्चित बन्धुहरु र उनीहरुका परिवारका सदस्यहरुलाई सहयोग गर्दै र बंशलाई अझ एकतावद्ध, सक्षम र सवल बनाउदै र बंशावली निर्माणको महान कार्यमा सहयोगको लागि समपुर्ण बन्धुहरुमा यस संस्था हार्दिक अपिल गर्दछ ।